Uppeldisstaður

Árin 2006 og 2007 keyptum við jarðirnar Stapa og Héraðsdal  I í Lýtingstaðarhreppi, Skagafirði. Þetta eru samliggjandi jarðir svo auðvelt er að reka stóðið á milli beitarhólfa beggja jarðanna .Við erum staðsett skammt hjá Svartá  þar sem Steinsstaðaskóli  var áður, en nú er rekið þar hótel. Bakkaflöt er þarna einnig í námunda, þar sem  rekin er veitingasala og ferðaþjónusta og þar er líka sundlaug. Á Svartánni er boðið uppá River rafting ferðir og þar er hægt að stunda silungsveiði en neðar, í Húseyjarkvíslinni, er laxveiði.  Ýmsir  möguleikar eru fyrir þá sem áhuga hafa á fjallgöngum, því merktar gönguleiðir eru inn til dala og upp til heiða . Grasa og berjatínslu er einnig hægt að stunda í  ósnortinni náttúrunni.  Næstu nágrannabæjir eru Héraðsdalur II , Laugadalur, Litli Dalur, Reykir, og Varmilækur.

Í landi Stapa er búið að planta um það bil 150 þúsund trjám af ýmsum tegundum.

Árið um kring er stór hluti Dallandshrossanna fyrir norðan, þá sérstaklega yngri hross og ræktunarmerarnar, enda voru þessar jarðir einmitt keyptar til að auka við beitarland og fá slægjur til heyskapar. Heyjað er  á báðum jörðunum, þó verður að telja Héraðsdal betri jörð hvað heyfeng varðar. Báðar eru jarðirnar frábærar fyrir hrossauppeldi, mikið landrými, nóg beit, nóg vatn, brekkur, skjól og víðáttumiklar sléttur þar sem hross finna fyrir frelsinu.

Í Stapa er nýtt ágætlega stórt hesthús  og lítil íbúð í enda þess.  Í Stapa er  einnig íbúðarhús  frá sjötta áratugnum  sem  nú hefur verið enduruppgert.

Í Héraðsdal I hefur verið unnið að lagfæringum og  endurnýjunum ýmiskonar og svæðið allt  snyrt og rafmagnsgirt. Stór og rúmgóð fjárhús voru til staðar sem hreinsuð hafa verið af ýmsum  innréttingum  sem tilheyra fjárbúskap. Nú hefur m.a. verið rýmt til í hlöðunni  og  settar þar upp nokkrar stíur svo mögulegt er að hýsa hross þar . Húsin eru mest notuð þegar reka þarf stóðið inn til merkingar og ormahreinsunar og fl. í þeim dúr og á vetrum sem skjól.

Í landi Stapa er stórt stöðuvatn, Stapavatn, sem blasir fallega við frá bæjarstæðinu. Það  er friðsælt  og gott að horfa  til vatnsins  með  öllu því  fuglalífi sem þar er. Tvö álftapör hafa gert sér hreiður undanfarin ár  og ýmsar tegundir anda og fjöldi flórgoða skapa skemmtilega stemmningu við vatnið.Uppi á Stapanum sjálfum krunkar hrafn á laupi sínum. Skagfirsk sumarkvöld eru  alveg einstök  þegar sólin dansar roðagyllt við ystu sjónarrönd við undirleik Héraðsvatna.  Örstutt vegalengd er  á Vindheimamela ef keyrt er frá Dalsplássinu svokallaða, ( svo heitir svæðið þar sem Héraðsdalur er), en  góð reiðleið liggur  líka  þangað frá Stapa. Merkilegt hvað við virðumst alltaf  falla fyrir stöðum sem  bera heitið Dalur!