Saga Dals

Dalur hestamiðstöð er tamningastöð sem rekin hefur verið á jörðinni Dallandi í Mosfellsbæ um áratugaskeið. Stöðin var formlega opnuð 1978 og var fyrst í eigu 6 aðila, þeirra Gunnars B. Dungal og Þórdísar Öldu Sigurðardóttur, Eyjólfs Ísólfssonar og Guðbjargar Sveinsdóttur, Jóhanns Friðrikssonar og Gunnlaugar Eggertsdóttur. Margir af þekktustu knöpum landsins hafa starfað í Dal í gegnum tíðina, sjá slóðina STARFSFÓLK DALS Í GEGNUM ÁRIN hér á heimasíðunni.

Í dag, janúar 2014

er það Halldór Guðjónsson sem stýrir framkvæmdum og er yfirmaður tamninga, þjálfunar og sýninga á hrossum í eigu Dals og Dallandsbúsins.

Auk Halldórs hefur eftirfarandi fólk starfað í Dal á síðustu misserum

Rúna Einarsdóttir starfaði í Dal mestan hluta ársins 2013 við þjálfun, kennslu, móttöku gesta og kynningu á ísl. hestinum.

Veturna 2012- 2013- 2014 hafa  þær Sandra Jonsson og Jessica Westlund frá Svíþjóð tamið og þjálfað af miklum krafti og góðri kunnáttu.

Meike Egge frá Þýskalandi vann við tamningar og þjálfun frá janúar 2013 fram í október 2013.

Hafliði Friðriksson, sem starfað hefur lengi í Dal, gengur í flest þau störf sem daglega þarf að inna af hendi í Dal, eins og aðstoð við fóðrun, útmokstur, ýmsar lagfæringar og  margt fleira.

Upphafið

Eyjólfur Ísólfsson

hóf tamningar fyrstur manna í Dal ásamt þeim Guðbjörgu Sveinsdóttur, Trausta Þór Guðmundssyni og Guðmundi Guðmundssyni. Eyjólfur  hannaði fyrstu innréttingarnar og Trausti Þór og hann unnu við smíðarnar og uppsetningu.

Í gegnum tíðina

Rúna Einarsdóttir var yfirmaður tamninga og þjálfunar í Dal 1985 - 86.

Veturinn 1989-90 rak Ingimar Ingimarsson tamningastöðina og þau Kolbrún Ingólfsdóttir bjuggu þá í Dal ásamt dætrum sínum.

Atli Guðmundsson og Eva Mandal störfuðu og ráku um tíma tamningastöð í Dal. Alls voru þau í samstarfi við okkur í Dal í 9 ár.

Fredrik Sandberg var yfirmaður Dals í tvö ár, (2010-12) en áður hafði hann unnið í einn vetur á staðnum við tamningar.

Sölvi Sigurðarson stýrði tamningum, þjálfun og sýningum á hrossum búsins í einn vetur. ( 2006-2007)

Adolf Snæbjörnsson hefur unnið við þjálfun í Dal bæði á árum árum, með Atla og Ingimari og síðar sá hann um tamningar í Dal þegar Fredrik Sandberg hætti.( 2012) og þar til Halldór tók við aftur.

Atli Guðmundsson,

tamningamaður og reiðkennari frá Hafnarfirði og Eva Mandal ráku um tíma tamningastöð á eigin vegum í Dal. Alls störfuðu þau Atli og Eva í 9 ár í Dal. Í þeirra tíð var m.a. byggð lítil reiðskemma sem nýtist ennþá mjög vel til frumtamninga. Atli tamdi og sýndi mörg hross frá Dallandi meðan hann starfaði hér, þar á meðal ýmsar af  þeim hryssum okkar sem fyrstar fóru í 1.verðlaun. Þetta voru t.d. heiðursverðlaunahryssan okkar Dúkkulísa og mæðgurnar Dagrún og Stórstjarna, allar þrjár fallnar frá í dag. Hryssur sem nýverið eru hættar í folaldseignum vegna aldurs og Atli sýndi og tamdi eru Katla, Dalla, Gnótt og Von. Atli keppti á Ormi frá Dallandi. Á Landsmótinu 1998, náðu Ormur og Atli þriðja sætinu í A fl., Ormur var þá 6 vetra gamall. Á Landsmótinu árið 2000 í Rvk. unnu þeir síðan A flokkinn. Aftur kepptu þeir félagar á Landsmótinu 2006 í A fl.og lentu þar í 6. sæti í A úrslitum. Sama ár unnu þeir gæðingafimina í Meistaradeildinni 2006. Á Dalsárum Atla keppti hann einnig á hrossum sem búið átti þá, m.a. á Heimsmeistaramótum á þeim Hróðri frá Hofsstöðum, Skag. og Reyni frá Hólum. Hann keppti og sigraði einnig ýmis mót á gæðingnum Þokka frá Höskuldsstöðum, sem Gunnar átti í fjölmörg ár. M.a. urðu Atli og Þokki í 3ja sæti í A.flokki gæðinga á Landsmóti, en þá var hesturinn orðinn 14 vetra gamall. Atli keppti á fjórðungsmóti á gæðingnum Sókroni frá Sunnuhvoli, reiðhesti Þórdísar (Sjá nánar um Sókron undir GREINAR- Um Gjallarbrú á forsíðu ) Atli kom einnig með tillögur og hafði áhrif á hvaða stóðhesta væri spennandi að nota á hryssurnar. Í tíð Atla og Evu komu margir Hafnfirðingar hér við sögu þar á meðal Adolf Snæbjörnsson, Hinrik Sigurðsson, Daníel Ingi Smárason, Eyjólfur Þorsteinsson og fl. sem unnu hér í lengri eða skemmri tíma.

Héðinn Jónsson,

ættaður frá Klaufabrekku í Svarfaðardal, vann og bjó í Dal um árabil, mest á þeim árum sem Atli og Eva voru í Dal og aðeins inn á tímabil Halldórs. Hann var ráðinn til almennra útiverka og aðstoðar við allskyns tilfallandi störf á búinu sem aldrei hefur skort. Hann var mikill dugnaðarforkur þegar hann réðst í verkefnin sem honum voru falin. Héðinn lést árið 2004. Hér í Dallandinu höfum við skírt tún eitt Héðinshöfða í minningu Héðins, en eitt af mörgum verkefnum hans var að bera skít á landsskika sem græða átti upp og undirbúa fyrir sáningu. Nú er Héðinshöfðinn grænt og fallegt beitarhólf.

Halldór Guðjónsson

hefur tekið þátt í ræktunarstarfinu með okkur af lífi og sál í gegnum þau 14 ár sem liðin eru frá því hann hóf störf í Dal. Hann leiðbeindi oft verknemum frá Hólaskóla með góðum árangri hér í Dal, en síðustu árin hefur hann stundað reiðkennslu á námskeiðum BHÍ, Reiðmanninum og erlendis. Hann útskrifaðist frá Hólaskóla sem búfræðingur 1995 og tók síðar hæstu einkunn sem reiðkennari þaðan vorið 2007. Helstu hross sem hann hefur keppt á frá Dallandi  og náð frábærum árangri með eru;  afburða töltarinn Nátthrafn þrefaldur Ístöltsmeistari, 3ja sæti á Landsmóti í tölti, skeiðhryssan og Íslandsmeistari í 250 m árið 2007 Dalla, Vonandi sem hann keppti mikið á um tíma og vann til margra verðlauna á m.a. keppti hann á Fjórðungsmóti og Landsmóti með góðum árangri. Auk þess hefur hann komið fjölda hryssna í góð fyrstu verðlaun á liðnum árum. Má þar nefna Hrímu undan Dúkkulísu frá Dallandi og Huginn frá Haga sem stóð efst 4ra vetra hryssna yfir landið árið 2005. Dýrð, Klöpp, Orka og Gumi frá Dallandi hafa öll unnið titilin Efnilegasta unghrossið hjá Hestamannafélaginu Herði með Halldór á baki.Þetta var á árunum 2005, 2006, 2007, og 2009.
Dýrð, Gerpla, Dýrleif, Fljóð, Hátíð, Hetja,Fjöður Duna, Klöpp, Folda, Gróska, Hákon, Hvatur öll frá Dallandi og Katarína  og Una frá Kirkjubæ eru allt öndvegishross  sem Halldór hefur tamið og komið í fyrstu verðlaun. Fleiri hross, sem Halldór tamdi frá búinu, hafa farið í fyrstu verðlaun erlendis svo sem Gumi frá Dallandi sem  var hæst dæmdi  fjórgangs stóðhestur í Svíþjóð 2010, fór í 8.31. Eldborg í Austurríki, Jófríður( sem varð hæst dæmda 5 vetra hryssa í Svíþjóð og yfir heiminn um tíma árið 2013) og Gullborg í Svíþjóð og fl. Halldór var kjörinn Íþróttamaður Mosfellsbæjar árið 2007.

Miklar framkvæmdir hafa átt sér stað í Dal í tíð þeirra Halldórs og Helle Laks konu hans .  M.a.bygging glæsilegrar reiðhallar með tengibyggingu, endurbygging gamla hesthússins 2006 og bygging 24 hesta húss og vélageymslu haustið 2008.Yfirsmiður við endurgerð gamla hesthússins var Guðjón Sigurðsson, en fyrirtækið Alefli sá um bygginu reiðhallar og nýs hestshúss.

Helle Laks,

er frá Uddevalla  í Svíþjóð og  útskrifaðist sem tamningamaður frá Hólum 2003. Hún hefur unnið við tamningar bæði í Dal og víðar hér á landi og tekið þátt í mörgum keppnum og sýningum. Hún er góður reiðmaður / tamningamaður, og af hestum frá Dallandi sem hún hefur keppt á með góðum árangri má m.a.nefna þá Leó, Kyndil og Sjóð. Nokkur sumur starfaði hún líka við garðyrkjustörf og trjárækt í Dallandi en hún hefur afburða hæfileika á sviði ræktunar og umhirðu plantna og á sér þar fáa líka .

Hafliði Friðrikson

 er ættaður úr Svarfaðardal og hefur unnið um árabil við Dallandsbúið og  tekið þátt í flestöllu sem hér hefur verið bjástrað við. Það má segja að Hafliði sé allt í öllu því hann er alveg ómissandi þegar koma upp verkefni sem snarlega þarf að inna af hendi með  vinnuvélum og tækjum, þar að auki sér hann um heygjafir til útigangshrossa og allskyns snyrtingu og viðhald á hesthúsunum og girðingum. Hér hefur verið lögð mikil áhersla á uppgræðslu mela og móa svo þau lönd megi gróa upp og nýtast betur til beitar. Hafliði hefur séð um dreifingu á húsdýraáburði og afgangs heyrúllum inn á þessi svæði. Síðan hefur grasfræjum verið sáð í rýrustu stykkin og rofabörð. Hann og Jón (Bobcat) Jónsson hafa einnig verið duglegir í reiðvegagerð í landinu svo nú eru margir útreiðarmöguleikar innan Dallandsjarðarinnar.

Nú árið 2013 er 55 hesta hús í Dal og þar við hliðina er 800 fm reiðhöll ásamt 100 fm sal (Ormsstofa) tengdum hesthúsi og reiðhöllinni. Salurinn er tilvalinn til bóklegrar kennslu en einnig er hægt að fylgjast þaðan með hvað fram fer í reiðhöllinni.

Haldin hafa verið ýmis reiðnámskeið í Dal í gegnum tíðina. T.d. Reiðmaðurinn á vegum Landbúnaðarháskólans. Sumaraðstaða er öll hin besta; hringvöllur, skeiðbraut, góðir aðgengilegir nátthagar svo eitthvað sé nefnt. Reiðleiðir eru bæði margvíslegar og nægar. Í Dallandi er að auki gamalt og notalegt hesthús sem hefur hýst ungviðið, yngri graðhestana og reiðhesta Gunnars og Þórdísar .